АОКАга йилнинг ўтган даврида 800га яқин мурожаат келиб тушди

Ўзбекистон Республикаси Президенти Администрацияси ҳузуридаги Ахборот ва оммавий коммуникациялар агентлигига 2021 йилнинг ўтган 8 ойи мобайнида 800га яқин мурожаат келиб тушди.

Мазкур мурожаатларнинг 100га яқини ижобий ҳал этилган бўлса, қолганлари юзасидан Агентлик ваколати доирасида қонуний тушунтиришлар берилди. 

Келиб тушган мурожаатларнинг асосий қисми — телевидениеда эфирга узатилаётган кўрсатувлар, сериаллар ва рекламалар мазмун-моҳияти ҳамда ОАВларда қайсидир муаммоларни ёритиш билан боғлиқ бўлди. Шунингдек, 200га яқин мурожаатда китоб чоп этиш, кутубхона очиш, лицензия олиш ва бошқа масалаларда амалий ёрдам сўралган. Бундан ташқари, 80 нафардан кўпроқ юртдошларимиз блогерлик, ахборот хизматлари фаолияти билан боғлиқ мурожаат юборган. 

Бундан ташқари, мурожаатлар орасида Агентлик ваколатига кирмайдиган масалалар ҳам йўқ эмас. Уй-жой, ишга жойлашиш, пенсия, тадбиркорлик билан боғлиқ муаммолар каби масалалар бўйича мурожаат қилган фуқароларга тушунтиришлар берилмоқда. 

Агентлик ҳар бир мурожаатга алоҳида эътибор билан ёндашади ва унда кўрсатилган масалаларни ўз ваколати доирасида қонуний ҳал этиш чораларини кўради.