АОКАда коррупцияга қарши курашиш бўйича амалга оширилаётган ишлар таҳлили

Ўзбекистон Республикаси Президентининг 2020 йил 29 июндаги “Ўзбекистон Республикасида коррупцияга қарши курашиш тизимини такомиллаштириш бўйича қўшимча чора-тадбирлар тўғрисида”ги ПФ-6013-сон, 2021 йил 6 июлдаги “Коррупцияга қарши муросасиз муносабатда бўлиш муҳитини яратиш, давлат ва жамият бошқарувида Коррупциявий омилларни кескин камайтириш ва бунда жамоатчилик иштирокини кенгайтириш чора-тадбирлари тўғрисида”ги ПФ-6257-сон Фармонлари ҳамда “Коррупцияга қарши курашиш фаолиятини самарали ташкил этишга доир қўшимча чора-тадбирлар тўғрисида”ги ПҚ-5177-сон қарорида белгиланган вазифалар, шунингдек, Ўзбекистон Республикаси Коррупцияга қарши курашиш Миллий кенгашидан келган топшириқлар ижроси юзасидан тизимли ишлар олиб борилмоқда.

Жумладан, Фармон билан тасдиқланган Коррупцияга қарши курашиш бўйича 2021-2022 йилларга мўлжалланган Давлат дастурида, Агентликка юклатилган вазифалар ижросини таъминлаш бўйича чора-тадбирлар режаси ишлаб чиқилиб, Агентлик директорининг “Ўзбекистон Республикаси Президентининг Фармони ижросини таъминлаш тўғрисида” 2021 йил 8 июлдаги 161-сон буйруғи билан тасдиқланди.

Коррупцияга қарши муросасиз курашиш борасидаги ишларни жамоатчиликка етказиб бориш ҳамда Коррупцияга қарши курашиш агентлигининг оммавий ахборот воситалари билан самарали ҳамкорлигини йўлга қўйиш борасидаги таклифлар Коррупцияга қарши курашиш агентлиги билан биргаликда ишлаб чиқилиб, тасдиқланган режа асосида ёритиш тадбирлари амалга оширилмоқда.

Бундан ташқари, Коррупцияга қарши курашиш соҳасида ҳуқуқ-тартибот органлари томонидан амалга оширилаётган чора-тадбирларга доир материалларлар ҳамда ушбу мавзулардаги брифинглар, матбуот анжуманлари ОАВ ва Агентлик расмий веб-сайти, ижтимоий тармоқлардаги расмий саҳифаларида мунтазам ёритиб борилмоқда.

Шунингдек, Агентлик директорининг “Ўзбекистон Республикаси Президентининг қарори ижросини таъминлаш тўғрисида” 2021 йил
8 июлдаги 160-сон буйруғи асосида Агентлик номенклатурасига кирувчи бўш иш ўринларига ишга қабул қилишни очиқ танлов асосида амалга ошириш ҳамда танлов доирасида ўтказиладиган синов тадбирларини Интернет тармоғи орқали реал вақт режимида кузатишни назарда тутувчи тартиб жорий этилди.

Мазкур буйруқ билан Агентликда коррупция холатларини барвақт аниқлаш ва олдини олиш, уларнинг сабаб ва шарт-шароитларини бартараф этиш, манфаатлар тўқнашувига йўл қўймаслик ҳамда коррупцияга нисбатан муросасиз муносабатни шакллантириш мақсадида, Коррупцияга қарши ички назорат (комплаенс-назорат) функциясини олиб бориш вазифаси Агентликнинг Ўз хавфсизлик хизматига юклатилди. Шу асосда Агентлик директорининг “Ўзбекистон Республикаси Президенти Администрацияси ҳузуридаги Ахборот ва оммавий коммуникациялар агентлиги Ўз хавфсизлик хизматининг Коррупцияга қарши ички назорат фаолияти тўғрисида”ги Низомни тасдиқлаш ҳақида 2021 йил 16 сентябрдаги 217-сон буйруғи тасдиқланди.

Бундан ташқари, Ўзбекистон Республикаси Президентининг ПҚ-5177-сон қарори ҳамда Агентликнинг 2021 йил 7 сентябрдаги “Ўзбекистон Республикаси Коррупцияга қарши курашиш Миллий кенгаши мажлисининг 4-сон баённомаси ижросини таъминлаш тўғрисида”ги 211-сон буйруғига биноан “Барча давлат ташкилоти ва идораларида мавжуд штат бирликлари доирасида Коррупцияга қарши ички назорат тузилмалари фаолиятини йўлга қўйиш” вазифаси юклатилган.

Ўзбекистон Республикаси Коррупцияга қарши курашиш агентлиги томонидан БМТ ТД дастури билан ҳамкорликда ишлаб чиқилган Коррупцияга қарши ички назорат тизимини жорий этиш учун зарур бўлган ички идоравий ҳужжатлар тўплами Агентликнинг “Ўзбекистон Республикаси Президенти Администрацияси ҳузуридаги Ахборот ва оммавий коммуникациялар агентлигининг Коррупцияга қарши курашиш бўйича асосий ички идоравий ҳужжатларини тасдиқлаш тўғрисида” 2021 йил 4 ноябрдаги 255-сон буйруғи билан тасдиқланиб, Агентлик ва унинг таркибий тузилмаларида коррупцияни тубдан йўқотиш, ходимларнинг ҳуқуқий онги ва маданиятини ошириш, коррупцияга нисбатан муросасиз муносабатни шакллантириш мақсадида амалиётга татбиқ этилди.

Агентликда коррупция ҳолатларини барвақт аниқлаш ва олдини олиш, уларнинг сабаб ва шарт-шароитларини бартараф этиш, манфаатлар тўқнашувига йўл қўймаслик, ходимларда коррупцияга нисбатан муросасиз муносабатни шакллантириш, шунингдек, ходимларнинг ахборот хавфсизлиги борасида малака ва билимларини ошириш мақсадида Коррупцияга қарши курашиш агентлиги ва бошқа мутасадди идоралардан масул ходимларни таклиф этган ҳолда, ўтган вақт мобайнида мавзуга оид 4 та семинар ўтказилди.

Шунингдек, Агентликда Коррупцияга қарши курашиш бўйича ички комиссия ташкил қилинган бўлиб, комиссия ўз фаолиятини Агентликнинг 2020 йил 10 августдаги 102-сон буйруғи билан тасдиқланган “Ўзбекистон Республикаси Президенти Администрацияси ҳузуридаги Ахборот ва оммавий коммуникациялар агентлигида Коррупцияга қарши курашиш бўйича ички комиссияси Низоми” асосида олиб бормоқда.

Агентликнинг 2021 йил 7 майдаги “Ўзбекистон Республикаси Президенти Администрацияси ҳузуридаги Ахборот ва оммавий коммуникациялар агентлигининг давлат хизматларини кўрсатишда идоравий алоқа марказини “all enter” ташкил этиш тартибини тасдиқлаш тўғрисида”ги 110-сон буйруғи асосида 1213 қисқа рақамли “call centre” ва (71) 244 23 34 рақамли “ишонч телефони” ташкил этилган бўлиб, rоррупциявий хавф-хатарларни минимум даражага тушириш бўйича амалий ишлар Агентликнинг расмий веб-сайти орқали доимий равишда эълон қилиб борилмоқда.

Ўзбекистон Республикаси Президентининг 2021 йил 23 октябрдаги ПҚ-5263-сон қарори билан тасдиқланган 2021 йилда амалдаги норматив-ҳуқуқий ҳужжатларни Коррупцияга қарши экспертизадан ўтказиш режаси ижросини таъминлаш мақсадида мазкур режага киритилган оммавий ахборот воситаларини рўйхатдан ўтказиш соҳасига тааллуқли норматив-ҳуқуқий ҳужжатлар (Ўзбекистон Республикаси Президентининг ПҚ-4640-сон “Ноширлик ва матбаа соҳасини янада ривожлантиришга оид қўшимча чора-тадбирлар тўғрисида” 2020 йил 16 мартдаги қарори, Ўзбекистон Республикаси Вазирлар Маҳкамасининг “Оммавий ахборот ва коммуникациялар соҳасида давлат хизматлари кўрсатишнинг айрим маъмурий регламентларини тасдиқлаш тўғрисида” 2019 йил 19 декабрдаги 1017-сон қарори ҳамда Давлат органлари ва ташкилотлари ахборот хизмати раҳбарини лавозимга тайинлашни Ўзбекистон Республикаси Президенти Администрацияси ҳузуридаги Ахборот ва оммавий коммуникациялар агентлиги ёки унинг ҳудудий бошқармалари билан келишиш, уларни аттестациядан ўтказиш ҳамда иш самарадорлигини баҳолаш тартиби тўғрисидаги низоми (рўйхат рақами 3187, 2019 йил
3 октябр) экспертизадан ўтказилди ва Ўзбекистон Республикаси Адлия вазирлигига юборилди (2021 йил 29 ноябрдаги 04-4798-сон хат).

Шунингдек, Ўзбекистон Республикаси Коррупцияга қарши курашиш миллий кенгашининг 2021 йил 19 августдаги 4 сонли баённомаси билан тасдиқланган Ўзбекистон Республикаси Коррупцияга қарши курашиш миллий кенгашининг 2021 йил иккинчи ярим йиллигига мўлжалланган Иш режасининг 20-бандига асосан, Ахборот ва оммавий коммуникациялар агентлиги тизимидаги қонунчилик базаси инвентаризациядан ўтказилди.

Агентлик томонидан келгусида ахборот ва ахборотлаштириш, ноширлик ва матбаа фаолиятига оид, шунингдек, очиқлик ва сўз эркинлигини таъминлашга доир амалдаги норматив-ҳуқуқий ҳужжатлар босқичма-босқич, режа асосида Коррупцияга қарши экспертизадан ўтказиб борилади.

“9 декабрь — Халқаро Коррупцияга қарши курашиш куни” доирасида кенг кўламли Антикоррупция ҳафталигини ўтказиш мақсадида Коррупцияга қарши курашиш агентлиги билан ҳамкорликда Медиа-режа ишлаб чиқилиб, тадбирни кенг жамоатчиликка этказиш бўйича ишлар самарали амалга оширилди ва Антикоррупция ҳафталиги доирасида ташкил этилган тадбирларда Агентлик вакилларининг фаол иштироки таъминланди.

Агентлик томонидан жамиятда коррупциянинг ҳар қандай кўринишига нисбатан муросасиз муносабатни шакллантириш, ходимларда коррупцияга қарши курашиш бўйича фаол дунёқараш ва мустаҳкам фуқаролик нуқтаи назарини шакллантирадиган чора-тадбирлар, шунингдек, коррупцияга қарши курашиш сиёсатининг мақсади, вазифалари ва натижалари ҳақида тезкор, холис ва тўлиқ ахборот етказиш юзасидан кенг қамровли ишлар давом эттирилмоқда.