Ishonch telefoni

«Jismoniy va yuridik shaxslarning murojaatlari to‘g‘risida»gi Qonunda belgilangan vazifalar ijrosini ta’minlash maqsadida O‘zbekiston Respublikasi Prezidenti Administrasiyasi huzuridagi Axborot va ommaviy kommunikatsiyalar agentligida 1213 raqamli Call-markaz yo‘lga qo‘yildi.

1213 raqamli Call-markazga qanday masalalarda qo‘ng‘iroq qilish mumkin?

— OAVning muayyan turi, xususiy nashriyot, poligrafiya xizmatlari faoliyatini lisenziyalash bo‘yicha;

— kontrafakt kanselyariya mahsulotlari yoki kitob va bosma nashrlar bo‘yicha;

— tizimdagi tashkilotlar faoliyati bo‘yicha;

— OAV, axborot xizmatlari, elektron va bosma matbuot, teleradiokompaniyalar faoliyati bo‘yicha;

— axborot olish erkinligi, jurnalistik faoliyat borasida hamda sohaga tegishli aniq va konkret masalalar yuzasidan jismoniy va yuridk shaxslarning murojaatlari qabul qilinadi.

1213 raqamli Call-markazga telefon orqali qoldirilgan murojaat qonunchilikda belgilangan tartibda normativ-huquqiy hujjatlar talablari asosida ko‘rib chiqiladi.

1213 raqamli Call-markazga qo‘ng‘iroq qilish qoidalari:

Jismoniy va yuridik shaxslarning huquqlari, erkinliklari va qonuniy manfaatlari buzilgan taqdirda barcha telefon moslamalaridan qisqa 1213 raqamini terish orqali qo‘ng‘iroq qilinadi.

Qo‘ng‘iroq qilish va murojaat etishda O‘zbekiston Respublikasining «Jismoniy va yuridik shaxslarning murojaatlari to‘g‘risida»gi Qonuni talablariga rioya etish lozim:

— Jismoniy shaxsning murojaatida jismoniy shaxsning familiyasi (ismi, otasining ismi), uning yashash joyi to‘g‘risidagi ma’lumotlar berilishi kerak.

— Yuridik shaxsning murojaatida yuridik shaxsning to‘liq nomi, uning joylashgan yeri (pochta manzili) to‘g‘risidagi ma’lumotlar ko‘rsatilgan bo‘lishi kerak.

Jismoniy va yuridik shaxsning murojaatida davlat organining, tashkilotning aniq nomi ko‘rsatilgan, shuningdek murojaatning mohiyati bayon etilgan bo‘lishi kerak.

Yodda tuting!

O‘zbekiston Respublikasining «Jismoniy va yuridik shaxslarning murojaatlari to‘g‘risida»gi Qonuni 38-moddasiga asosan, Murojaatlar to‘g‘risidagi qonun hujjatlarini buzganlik uchun javobgarlik ko‘zda tutilgan.

Murojaatlar to‘g‘risidagi qonun hujjatlarini buzganlik, xuddi shuningdek tuhmat va haqoratdan iborat murojaat berganlik belgilangan tartibda javobgarlikka sabab bo‘ladi.

O‘zbekiston Respublikasi Jinoyat kodeksining 237-moddasiga asosan, yolg‘on bayon etilgan ma’lumot, ya’ni jinoyat to‘g‘risida bila turib yolg‘on xabar yetkazish uchun javobgarlik nazarda tutilgan.

--------------------
O‘zbekiston Respublikasi Prezidenti Administratsiyasi huzuridagi Axborot va ommaviy kommunikatsiyalar agentligi va uning tarkibiy tuzilmalari faoliyati borasida murojaat, taklif yoki shikoyatingiz bormi?

Axborot va ommaviy kommunikatsiyalar agentligi "Jismoniy va yuridik shaxslarning murojaatlari to‘g‘risida"gi Qonun va “O‘zbekiston Respublikasida korrupsiyaga qarshi kurashish tizimini yanada takomillashtirish chora-tadbirlari to‘g‘risida”gi Prezident Farmonida belgilangan vazifalar ijrosini ta’minlash maqsadida "Komplayens-nazorat”xizmati (71-244-23-34) faoliyatini yo‘lga qo‘ydi.

"Komplayens-nazorat”xizmati orqali qo‘ng‘iroqlarni qabul qilish qoidalari:

— "Komplayens-nazorat”xizmati orqali jismoniy va yuridik shaxslar  Agentlik va uning viloyatlardagi boshqarmalari hamda tizim tashkilotlari xodimlarining korrupsion va boshqa nojo‘ya xatti-harakatlari to‘g‘risida murojaatlar qabul qilinadi;

— murojaat qiluvchi jismoniy yoki yuridik shaxs “ishonch telefoniga” qo‘ng‘iroq qilganda  familiyasi, ismi, otasining ismi, yashash joyi, yuridik shaxsning nomi, javob yuboriladigan pochta manzili va bog‘lanish uchun aloqa telefon raqami, shuningdek xabarning mazmun-mohiyati to‘g‘risida ma’lumotlarni taqdim etishi shart.

— "Komplayens-nazorat” xizmati orqali murojaat qiluvchi jismoniy yoki yuridik shaxsning murojaat mazmuni va taqdim etgan ma’lumotning maxfiyligi kafolatlanadi

"Komplayens-nazorat” xizmatiga qo‘ng‘iroq qilish vaqtlari:

— dushanba-juma kunlari soat 9:00dan 18:00ga qadar (tushlik vaqti: 13:00dan 14:00gacha, shanba va yakshanba dam olish kunlari).

"Komplayens-nazorat”xizmatiga qoldirilgan murojaatlar qonunchilikda belgilangan tartibda, normativ-huquqiy hujjatlar talablari asosida ko‘rib chiqiladi.

Yodda tuting!

O‘zbekiston Respublikasining «Jismoniy va yuridik shaxslarning murojaatlari to‘g‘risida»gi Qonunning 38-moddasiga asosan Murojaatlar to‘g‘risidagi qonun hujjatlarini buzganlik uchun javobgarlik ko‘zda tutilgan.

Увеличить на0%