Asadjon Xodjayev Surxondaryo viloyatidagi OAV, axborot xizmatlari, nashriyot va kutubxonalar faoliyati bilan tanishdi
Axborot va ommaviy kommunikatsiyalar agentligi direktori Asadjon Xodjayev va mas’ul xodimlar xizmat safari bilan Surxondaryo viloyatiga keldi. Agentlik mutasaddilari safarning birinchi kunida rejalashtirilgan tadbirlar doirasida qator uchrashuvlarni o‘tkazdi.
Agentlik tomonidan mahalliy davlat hokimiyati organlari, idora va tashkilotlar axborot xizmatlari faoliyati baholab boriladi. Uchrashuvda mazkur reytinglarda past o‘rinlarni egallagan axborot xizmatlari faoliyati tanqid qilindi, hududiy media-rejalarning o‘z vaqtida, samarali ijro etilishi lozimligi qayd etildi.
«Tashkilotingizning faoliyati to‘g‘risida ko‘proq axborot berish, yangicha usul va kommunikatsiyalardan foydalanish, ijtimoiy tarmoqlarda faol bo‘lish lozim. OAV va mustaqil jurnalistlar bilan ko‘proq ishlang, ularga yaqin bo‘ling», dedi Agentlik direktori.
Bugungi kunda viloyatda 40 dan ziyod OAV faoliyat ko‘rsatayotgan bo‘lsa-da, ular orasida internet nashrlari soni atigi to‘rtta. Bu esa viloyat ijtimoiy-siyosiy hayotiga doir axborotlarni aholiga o‘z vaqtida yetkazish imkoniyatini cheklaydi. Bosma nashrlarda e’lon qilinayotgan materiallar esa ular chop etilgunga qadar eskirib qolyapti.
«Axborot tarqatish tezligi bo‘yicha ijtimoiy tarmoqlar va mobil messenjerlar bilan raqobatlashish qiyin. Shu bois bunday holatda faqatgina chuqur tahliliy materiallar orqaligina o‘quvchi e’tiborini qozonish mumkin, — deya ta’kidladi A.Xodjayev. — E’lon qilinayotgan materiallar sifati yuqori bo‘lsa, nashr o‘quvchilari safi ham kengayadi».
Agentlik direktori A.Xodjayev matbaa mahsulotlarining sifati, sohani malakali kadrlar bilan ta’minlash, bu borada Agentlik tomonidan amalga oshirilayotgan ishlar haqida to‘xtaldi.
Uchrashuvda chop etilayotgan kitoblarni ilg‘or texnologiyalar bilan boyitish kerakligi ta’kidlandi. «Har bir kitobning QR kodi, mobil qurilmalar yordamida o‘qish mumkin bo‘lgan 3D ko‘rinishlari bo‘lsa, undan nusxa ko‘chirish imkoniyati ham bo‘lmaydi. Shu bois nashriyotlarimiz ham zamonga, uning talablariga moslashishi zarur», — deya ta’kidladi Asadjon Xodjayev.
«Kutubxona — insonning kamolotga erishishida eng muhim vositalardan biri. Bu yerda badiiy, ilmiy, publitsistik asarlar qancha ko‘p bo‘lsa, mahalliy aholi va, ayniqsa, yoshlar uchun shuncha foydali bo‘ladi», — dedi A.Xodjayev.
Kutubxona xodimlari bilan uchrashuvda uning faoliyatini rivojlantirish, mavjud muammolarni bartaraf etish yo‘llari haqida fikr almashildi. Kerakli tavsiya va takliflar berilib, Agentlik bu borada hamisha qo‘llab-quvvatlashga tayyorligi qayd etildi.