Китобхонлик дунё миқёсида: Абу Дабида 34-халқаро китоб кўргазма-ярмаркаси давом этмоқда

Дунёнинг 96 мамлакатидан 1 400 дан ортиқ нашриёт, китоб савдо ташкилоти ва адабиёт соҳаси вакиллари,  шоир ва носирларни жамлаган нуфузли китоб ярмаркаси жорий йил 25 апрелдан буён бестселлер асарларни китобсеварларга тақдим этмоқда. 

Халқаро кўргазмада АОКА бўлим бошлиғи Авазхон Валихонов раҳбарлигида ўзбекистонлик етакчи нашриётлар раҳбарлари, жумладан,  “Ўзбекистон”, “Ёш куч”, “Замин-нашр”, “Ҳилол-нашр”, “Янги аср авлоди”, “Ёшлар матбуоти”, “Best book”, “Ёшлар матбуоти” нашриётлари, “Ўздавкитовсавдотаъминот” ташкилоти, шунингдек, болалар ёзувчиси Мадина Мўминова иштирок этмоқда. 

Анъанавий тус олган мазкур 34-китоб-кўргазма ярмаркасида жаҳон адабиётлари қаторида ўзбек адабиёти намуналари, турли тилларга таржима қилинган асарлар, замонавий ва анъанавий нашрлар намойиш этилмоқда. 

Қайд этиш мумкинки, мамлакатимиз кўргазма стенди хорижий иштирокчилар ва меҳмонларда катта қизиқиш уйғотмоқда.

Бугун ярмарка доирасида Ўзбекистон вакиллари хорижий нашриётлар ва адабий ташкилотлар, жумладан, БААнинг нашриётлари, китоб муаллифлари ва адабий агентликлари билан қатор учрашувлар ўтказди. Ўзаро мулоқотларда тажриба алмашиш, ўзбек адабиётини хорижий тилларга ва чет эл адабиётини ўзбек тилига таржима қилиш, ҳамкорлик алоқаларини ривожлантириш ҳамда ижодий учрашувлар, муаллифлар билан бевосита музокаралар ўтказилди.

Маълумот учун: халқаро китоб кўргазма-ярмарка 2025 йилнинг  5 май кунига қадар ADNEC кўргазмалар марказида давом этади.